Pesë anëtarë të një grupi të organizuar kriminal janë dënuar në Mbretërinë e Bashkuar, pasi u shpallën fajtorë për përfshirje në një rrjet të furnizimit me kanabis në sasi të mëdha në zonat Hull dhe East Yorkshire. Dënimet u dhanë pas një hetimi të zhvilluar nga ekipi britanik kundër krimit të organizuar Kinetic Organised Crime Group Team.
Në seancën e zhvilluar më 17 korrik 2026 në Gjykatën e Kurorës në Hull, Armir Metaj, 30 vjeç, u dënua me 5 vjet e 4 muaj burg, pasi pranoi fajësinë për akuzën e komplotit për shpërndarjen e kanabisit (drogë e klasës B). Ai ishte akuzuar edhe për komplot në shpërndarjen e kokainës (klasa A), por u shpall i pafajshëm për këtë akuzë pas një gjyqi në Gjykatën e Kurorës në Grimsby.
Po ashtu, Patryk Gilwanowski (33 vjeç), Endri Arifaj (35 vjeç) dhe Gazmir Hameti (45 vjeç) pranuan fajësinë për komplot në shpërndarjen e kanabisit. Gilwanowski u dënua me 2 vjet e 6 muaj burg, Arifaj me 1 vit e 8 muaj, ndërsa Hameti me 1 vit e 7 muaj burg.
Ndërkohë, Manuela Metaj, 33 vjeçe, u shpall fajtore për posedim të pasurisë me origjinë kriminale dhe u dënua me 18 muaj burg, dënim i pezulluar për një vit. Ajo u shpall e pafajshme për akuzën e komplotit për shpërndarjen e kanabisit.
