Policia greke ka arrestuar një shqiptar 44-vjeçar, i cili dyshohet si autor i disa grabitjeve në veriun e Evias dhe Ftiotidë.
Sipas raportimeve nga mediat greke, shqiptari, banues në Istiaia, kishte kryer një vjedhje fillimisht në Edipsos, ku kishte marrë një automjet nga oborri i një shtëpie. Pas kësaj, ai kishte udhëtuar drejt Ftiotidës, duke vazhduar aktivitetin e tij kriminal.
Një ditë më vonë, ai dyshohet se ka hyrë me forcë në shtëpinë e një mësueseje në Nea Anhialos, nga ku ka marrë bizhuteri, orë, një laptop, një tablet dhe objekte të tjera me vlerë.
Identifikimi i tij është realizuar pas lokalizimit të tabletit të vjedhur nga pronarja e shtëpisë, e cila përdori një aplikacion për të gjurmuar vendndodhjen e tij. Ajo e informoi menjëherë policinë, e cila iu përgjigj duke shkuar në zonën e Glyfës në Ftiotidë.
Gjatë kontrollit, efektivët zbuluan në automjetin e të arrestuarit tabletin dhe disa sende të tjera të vjedhura. Hetimet e mëtejshme zbuluan gjithashtu se makina që ai përdorte ishte gjithashtu e vjedhur.
Në momentin e arrestimit, shqiptari ndodhej në plazh dhe, përpjekur të largohej, u neutralizua dhe u arrestua nga forcat policore greke.
Sipas autoriteteve, verifikimet treguan se 44-vjeçari ishte në Greqi ilegalisht që nga viti i kaluar. Hetimet vazhdojnë për të përcaktuar nëse ai ka pasur përfshirje në vjedhje të tjera.
