Qeveria ka dhënë dritën jeshile për një sërë projektesh infrastrukturore në Malësinë e Madhe, të cilat synojnë përmirësimin e rrjetit rrugor dhe nxitjen e zhvillimit ekonomik e turistik të zonës.
Ndër investimet e miratuara është ndërtimi i urës mbi Përroin e Thatë në fshatin Kamicë, një vepër infrastrukturore me gjatësi 66 metra dhe gjerësi 6.3 metra, e konsideruar e rëndësishme për lidhjen dhe lëvizjen e banorëve.
Po ashtu, projektet parashikojnë ndërhyrje në hyrje-daljet e qytetit të Koplikut, si dhe rikonstruksionin e aksit rrugor që të çon drejt Syrit të Sheganit, në Njësinë Administrative Kastrat.
Në fokus të investimeve është vendosur edhe rruga e Lepushës në Kelmend, një segment me rëndësi të veçantë për turizmin malor, duke qenë se zona është kthyer vitet e fundit në një nga destinacionet më të frekuentuara nga vizitorët vendas dhe të huaj.
Deputeti i qarkut Shkodër, , ka deklaruar se miratimi i këtyre projekteve vjen pas kërkesave të vazhdueshme të paraqitura prej tij në Kuvend, në kuadër të Paketës së Alpeve.
Sipas tij, investimet do të sjellin përmirësim të infrastrukturës rrugore, do të lehtësojnë qarkullimin dhe do të krijojnë më shumë mundësi për zhvillimin e turizmit dhe përmirësimin e jetës së banorëve të Malësisë së Madhe.
