Policia greke ka realizuar një operacion të rëndësishëm ndaj një grupi kriminal, i cili dyshohet se kishte organizuar një seri grabitjesh në argjendari në rajonin e Atikës. Në këtë aksion, janë arrestuar nëntë individë, të moshës nga 21 deri në 45 vjeç.
Sipas informacioneve nga autoritetet, grabitësit ishin në gjendje të hynin në dyqanet e bizhuterive brenda një minute dhe të merrnin objekte të çmuara. Pamjet nga kamerat e sigurisë dokumentojnë sesi ata thyenin hyrjet e dyqaneve dhe në pak sekonda mbushnin duar me çdo gjë që gjenin, duke ia dorëzuar këto sende bashkëpunëtorëve të tyre që prisnin jashtë.
Bizhuteritë e vjedhura ngarkoheshin në arka dhe kazanë plehrash me qëllim që të kalonin pa u vënë re, ndërsa më pas autorët largoheshin me mjete të vjedhura.
Gjatë operacionit policor, janë sekuestruar bizhuteri me një vlerë prej rreth 370 mijë eurosh, si dhe 4 mijë euro cash.
Hetimet sugjerojnë se banda ka kryer grabitje në 13 argjendari, kryesisht në zonat e Pireut, Koridallos, Nikaias, Moschatos dhe disa pjesë të tjera të Atikës.
Ndaj të arrestuarve është ngritur një akuzë për krijimin dhe pjesëmarrjen në një organizatë kriminale, vjedhje të rënda të kryera në mënyrë të organizuar dhe të përsëritur, dëmtim të pronës dhe pastrim parash. Tre nga ata janë lënë në paraburgim me vendim nga autoritetet greke.
