Kryeministri izraelit, Benjamin Netanyahu, ka bërë apel që Shtetet e Bashkuara të ndalojnë shitjen e sistemeve të armëve të avancuara për Turqinë, duke theksuar se një veprim i tillë do të dëmtonte balancën strategjike në Lindjen e Mesme.
Në një intervistë për Fox News, ai e kritikoi me forcë Turqinë, duke e përshkruar atë si “një regjim të ndikuar nga Vëllazëria Myslimane”.
Netanyahu shprehu bindjen se Turqisë nuk duhet t’i jepen avionët luftarakë F-35 apo motorët F110 për flotën e saj ajrore. “Nuk besoj se atyre duhet t’u jepen F-35 ose motorë për avionët e tyre luftarakë,” theksoi ai, në përgjigje të deklaratave të Presidentit amerikan Donald Trump, i cili muajin e kaluar sugjeroi një mbështetje për shitjen e motorëve F110 dhe rikthimin e Turqisë në programin F-35.
Ai paralajmëroi se një zhvillim i tillë do të “përmbyste ekuilibrin e fuqisë në Lindjen e Mesme”, duke theksuar se kjo ekuilibër mbështetet mbi superioritetin ajror të Izraelit dhe praninë ushtarake amerikane në rajon.
Netanyahu e pranoi Turqinë si “një vend të madh”, por nuk e kurseu kritikën për presidentin Rexhep Tajip Erdogan, duke akuzuar atë se “e kërcënon hapur Izraelin me shkatërrim” dhe duke përmendur gjithashtu praninë ushtarake turke në veriun e Qipros.
Përsa i përket marrëdhënieve me presidentin amerikan, Netanyahu tha se mes tyre ekziston një bashkëpunim të ngushtë, megjithëse herë pas here ndodhin mospajtime.
“Ne i shohim pothuajse të gjitha në të njëjtën mënyrë. Kemi mosmarrëveshje here pas here, por i zgjidhim ato sepse jemi aleatë,” shprehu ai, duke theksuar se të dy liderët diskutojnë hapur për çështjet ku kanë qëndrime të ndryshme.
Sa i përket Iranit, Netanyahu përsëriti se Teherani nuk duhet të ketë mundësi të sigurojë armë bërthamore apo mjetet për të, duke e konsideruar Iranin si një kërcënim jo vetëm për Izraelin, por edhe për interesat amerikane.
Ai gjithashtu theksoi se ndalimi i ndikimit të Iranit në rajon mund të krijojë mundësi për avancim në procesin e paqes me Libanin dhe për marrëveshje të reja rajonale.
Në përfundim të intervistës, duke shënuar 250-vjetorin e pavarësisë së Shteteve të Bashkuara, Netanyahu e përshkroi Amerikën si “një forcë të madhe për të mirën”, duke theksuar se “pa Amerikën nuk do të kishte demokraci apo liri në botë”.
