Aeroporti Ndërkombëtar i Rinasit ka bërë të ditur se është sekuestruar një sasi prej 46 kilogramësh lëndë narkotike, e dyshuar si Cannabis sativa.
Sipas njoftimit zyrtar, gjatë kontrollit të bagazheve të pasagjerëve të një fluturimi nga Toronto në Rinas, dy valixhe kanë tërhequr vëmendjen për përmbajtjen e tyre të dyshimtë.
Pas një kontrolli fizik, që u zhvillua në prani të pronarëve të bagazheve, autoritetet zbuluan 46 kilogramë Cannabis sativa, të shpërndara në 89 paketime.
Identiteti i individëve të përfshirë ende nuk është bërë publik. Ata, së bashku me lëndën narkotike të sekuestruar, janë dorëzuar në duar të Policisë së Shtetit, e cila ka nisur procedurat dhe hetimet për të zbardhur plotësisht këtë rast.
