Një shtetas francez ka rënë në prangat e Policisë Kufitare të Muriqanit, pasi dyshohet se përpiqej të nxirrte në mënyrë të paligjshme një shtetase tajlandeze nga Shqipëria.
Identiteti i të arrestuarit është Tom Haac, 26 vjeç, me origjinë nga Franca.
Gjatë një kontrolli të detajuar në automjetin e tij në Pikën e Kalimit Kufitar të Muriqanit, policia zbuloi një valixhe në sediljen e pasme, brenda së cilës ishte fshehur një shtetase nga Tajlanda. Kjo e fundit dyshohet se po tentonte të largohej ilegalisht nga territori shqiptar.
Hetimet e para sugjerojnë se plani i Tom Haac ishte që të transportonte shtetasen tajlandeze përmes Malit të Zi dhe më pas në Kroaci, me destinacion të fundit Francën, duke anashkaluar kështu procedurat ligjore për hyrjen në këto vende.
Pasi u zbulua ky rast, policia mori masa të menjëhershme duke arrestuar në flagrancë si shtetasin francez ashtu edhe shtetasen tajlandeze. Vendngjarja është siguruar, ndërsa hetimet për zbardhjen e plotë të rrethanave vijojnë.
