Me afrimin e protestës të paralajmëruar për nesër nga disa banorë të zonës, kompania GENER 2 ka dalë sërish me një reagim publik lidhur me situatën e projektit turistik “Blue Borgo”.
Në deklaratën e saj, kompania shpreh se respekton të drejtën e qytetarëve për të protestuar në mënyrë paqësore, por thekson se asnjë kauzë nuk mund të justifikojë, sipas saj, dëmtimin e pronës apo cënimin e investimeve private.
Kjo reagim vjen në një periudhë tensioni të ngritur, pasi protesta e ardhshme është parashikuar të zhvillohet në kantierin e ndërtimit. Ndërkohë, kompania rikujton ngjarjet e 13 qershorit, duke pretenduar se gjatë asaj proteste janë shkaktuar dëme materiale.
GENER 2 apelon për veprime nga institucionet përkatëse për të siguruar zhvillimin paqësor të protestës dhe për të parandaluar çdo akt dhune apo hyrje të paautorizuar në kantier, duke theksuar se mbrojtja e pronës private dhe siguria e punonjësve janë elemente thelbësore të shtetit ligjor.
