Letra e arkitektit holandez Reinier de Graaf drejtuar Edi Ramës, në librin “The Albanian Files” ku sugjerohet hapur që Shqipëria “të mos mbajë më kurrë zgjedhje” dhe që kryeministri të kthehet në “Mbret”, zbulon fytyrën e vërtetë të këtij pushteti tradhëtarësh të babëzitur.
Kjo nuk është thjesht lajthitja e një servili, por prova e qartë e skemës se si Rama blen mbështetjen ndërkombëtare. Duke i ushqyer dhe majmur këta “korba” me paratë e taksave tona dhe para të pista të cilat kjo qeveri lavatriçe pastron, kërkohet mbështetja e tyre në asgjësimin e demokracisë. E gjitha kjo bëhet në kurriz të së ardhmes sonë, me një plan të errët dhe dashakeq: të zbrazet vendi, të përzehen shqiptarët dhe Shqipëria të mbushet me të huaj, vetëm e vetëm që pushteti të sundojë i qetë dhe i pashqetësuar përgjithmonë.
Sot, çdo qytetar aktiv dhe që e do Shqipërinë duhet të refuzojë të heshtë dhe të pranojë këtë realitet të hidhur. Ky shërbim makabër ndaj të keqes kërkon t’i vjedhë këtij populli të drejtën thelbësore për të jetuar i lirë në shtëpinë e vet.
Ne nuk do të lejojmë kurrë që ëndrrat e tyre për pushtet absolut të kthehen në realitet. Asnjë kullë, asnjë pazar dhe asnjë arkitekt apo politikan i blerë nuk duhet ta çojë ndërmend që mund të vlejë më shumë se Shqipëria dhe liria e saj. Koha për të mbrojtur demokracinë është tani! Dorëheqja e Ramës dhe qeverisë së tij mbetet shpëtimi i vetëm i të ardhmes së kombit tonë!
