Forcat e policisë greke kanë shkatërruar një grup kriminel të dyshuar për trafikimin e sasive të mëdha të drogës në Mykonos dhe në rajonin e Atikës, gjatë një operacioni masiv hetimor që rezultoi me arrestimin e gjashtë individëve.
Operacioni ka marrë vend mëngjesin e së mërkurës, pas një hetimi të gjerë që përfshinte përdorimin e metodave speciale, analiza komunikimesh, verifikime të kryqëzuara të të dhënave, si dhe profilizimin e të dyshuarve. Hetimi kishte dokumentuar aktivitetin kriminal të grupit që nga mesi i prillit 2026.
Grupi, sipas dyshimeve, funksiononte si një rrjet i strukturuar mirë, me një hierarki të qartë dhe role të ndara, duke operuar kryesisht në zona me fluks të lartë turistik dhe ekonomik.
Një 37-vjeçar me origjinë shqiptare qëndron në krye të organizatës, i cili dyshohet se kishte përgjegjësinë për koordinimin e të gjithë aktivitetit të paligjshëm: nga sigurimi i furnitorëve të drogës, organizimi i transportit, menaxhimi i depozitave të fshehta, deri te shpërndarja në treg dhe kontrolli i fitimeve nga aktiviteti.
Një 38-vjeçar grek, që është konsideruar si bashkëpunëtor i tij i drejtpërdrejtë, dyshohet se ka luajtur një rol kyç në shpërndarje dhe në kontaktet me klientët, si dhe në menaxhimin e pjesëve të ndryshme të rrjetit. Autoritetet e përshkruajnë atë si “zëvendësdrejtor” të grupit.
Një 25-vjeçar ishte i ngarkuar me gjetjen e klientëve, shpërndarjen e drogës dhe mbikëqyrjen e transaksioneve të vogla në terren.
Një tjetër person, një 38-vjeçar nga Rumania, dyshohet se kishte një rol mbështetës, duke përfshirë ruajtjen e drogës, administrimin e depove dhe mbikëqyrjen e pikave të fshehta, duke marrë pjesë herë pas here në shpërndarje.
Arrestimi i një gruaje 31-vjeçare, e cila dyshohet se kishte lidhje me këtë rrjet, u realizua për posedim droge.
Hetimet kanë zbuluar gjithashtu se anëtarët e grupit kishin krijuar një aktivitet të dukshëm ligjor, duke operuar një kompani shërbimesh transporti me furgonë në Mykonos, e cila shërbente si mbulesë për lëvizje, shpërndarje dhe kontakte me klientët, duke justifikuar udhëtimet e shpeshta në ishull.
Gjatë kontrolleve në banesa dhe në ambiente të tjera të përdorura si baza të fshehta në Mykonos, Pire dhe Perama, policia ka arritur të sekuestrojë sasi të mëdha droge dhe pajisje të shumta të lidhura me trafikimin:
Kokainë: 2.69 kg
Kokainë rozë (Tusi): 705.65 g
MDMA: 754.4 g
Kanabis i papërpunuar: 1.418 kg
Kanabis i përpunuar (çokollatë): 8 g
Ketaminë: 205.7 g
Kërpudha halucinogjene: 1 g
846 tabletat farmaceutike dhe substanca të ndryshme
30 letra me substancë narkotike të panjohur
Po ashtu, u sekuestruan:
5 peshore elektronike precize
14 telefona celularë
4 furgonë
2 motoçikleta dhe 2 automjete
një kasafortë
një numërues elektronik parash
materiale paketimi (qese najloni)
shuma parash: 94,575 euro dhe 11,500 dollarë
Sipas të dhënave hetimore, çmimet e drogës në tregun lokal ishin si vijon:
Kokainë: 120–200 €/gram
Kokainë rozë: 170–200 €/gram
MDMA: 60–80 €/gram
Ekstazi: 20 €/tabletë
Kanabis: 20–30 €/gram
Ketaminë: 150–180 €/gram
LSD (letra): 20 €/copë
Kërpudha halucinogjene: 40 €/gram
Tableta qetësuese: 5 €/copë
Autoritetet vlerësojnë se grupi kishte realizuar mbi 700,000 euro nga aktivitetet e tij të paligjshme.
