Sot në Kavajë, një krim i rëndë brenda një familjeje ka tronditur komunitetin. Një përleshje mes dy vëllezërve të moshuar ka rezultuar fatale, duke çuar në vdekjen e njërit prej tyre.
Ngjarja e rëndë ndodhi rreth orës 20:30, në fshatin Agonas, Kavajë. Sipas burimeve zyrtare nga policia, dy vëllezërit, M. Rr., 76 vjeç dhe E. Rr., 74 vjeç, po punonin së bashku në një arë për të mbledhur ushqimin e nevojshëm për blegtorinë.
Për arsye që ende nuk janë sqaruar, një konflikt i papritur shpërtheu midis tyre. Gjatë këtij përplasje, M. Rr., 76 vjeç, nxorri një thikë dhe e goditi disa herë vëllain e tij më të vogël.
I plagosuri, E. Rr., u transportua me urgjencë në spital nga anëtarët e familjes dhe dëshmitarët, në përpjekje për të marrë ndihmën e nevojshme mjekësore. Megjithatë, për shkak të plagëve të rënda dhe humbjes së madhe të gjakut, 74-vjeçari nuk arriti të mbijetojë dhe ndërroi jetë gjatë rrugës, pa arritur në spital.
Forcat e Policisë së Kavajës mbërritën menjëherë në vendngjarje, ku arritën të lokalizojnë dhe të arrestojnë autorin e dyshuar të krimit. 76-vjeçari u shoqërua në komisariat për të vazhduar procedurat e nevojshme ligjore.
