Kryeministri Edi Rama mori pjesë në nënshkrimin e një Memorandumi Mirëkuptimi me kompaninë Eni S.p.A., i cili fokusohet në studimin e fizibilitetit për krijimin e kapaciteteve kombëtare për furnizimin dhe magazinimin e produkteve të naftës dhe gazit. Ky hap ka si qëllim sigurimin e furnizimit, nxitjen e zhvillimit ekonomik dhe përforcimin e rolit të Shqipërisë në rajon.
“Marrëdhënia jonë me Italinë është jashtëzakonisht strategjike. Në këtë kontekst, lidhja e ngushtë me Eni-n, një lider në tregun e hidrokarbureve, na shtyu të kërkojmë bashkëpunim. Diskutuam për krijimin e një operatori të ri, që do të marrë përsipër edhe garantimin strategjik të naftës. Kemi filluar një dialog që na ka çuar në realizimin e këtij hapi të parë. Kjo kompani ka mundësinë të bëhet një model i ri në tregun e naftës dhe hidrokarbureve, duke kontribuar edhe në tregtinë ndërkombëtare të naftës,” tha Rama.
“Jemi shumë të inkurajuar dhe të kënaqur me këtë bashkëpunim me një kompani kaq të madhe. Kam një besim të plotë. Me nënshkrimin e këtij memorandumi, ne hapim rrugën që përpara gushtit të rikthehemi këtu për të shpallur regjistrimin e kësaj kompanie të re, e cila do të jetë një partner shumë i rëndësishëm për popullin shqiptar dhe një garant i Shqipërisë falë këtij bashkëpunimi me Italinë,” përfundoi ai.
