Nëse ndiheni si një magnet për mushkonjat, shkenca ka një përgjigje për këtë fenomen. Studiuesit kanë zbuluar se këto insekte nuk zgjedhin rastësisht viktimat e tyre, por udhëhiqen nga një përzierje faktorësh biologjikë dhe kimikë që ndryshojnë nga një individ në tjetrin.
Sipas ekspertëve, mushkonjat tërhiqen kryesisht nga dioksidi i karbonit i nxjerrë gjatë frymëmarrjes, nga aroma e trupit, temperatura e lëkurës dhe lagështia. Vetëm mushkonjat femra janë ato që pickojnë njerëzit, pasi nevojitet gjak për riprodhim.
Shkencëtarët shpjegojnë se dioksidi i karbonit është sinjali fillestar që i drejton mushkonjat drejt njeriut. Kur ato afrohen më shumë, fillojnë të perceptojnë aromat specifike të trupit, që mund ta bëjnë një person më tërheqës se një tjetër.
Ndryshe nga besimet e zakonshme, nuk ka prova të qarta shkencore që tregojnë se mushkonjat preferojnë lloje të caktuara gjaku. Po ashtu, nuk është provuar se ngjyra e syve, flokëve apo e lëkurës ndikon në mënyrë të drejtpërdrejtë në pickimet e tyre.
Një fokus i rëndësishëm për studiuesit është mikrobioma e lëkurës, e cila prodhon qindra përbërje kimike të ndryshme. Disa prej këtyre përbërjeve janë veçanërisht atraktive për mushkonjat.
Një studim i fundit ka zbuluar një substancë të quajtur “1-okten-3-ol”, e njohur gjithashtu si “alkooli i kërpudhave”, që formohet nga zbërthimi i sebumit të lëkurës. Individët që krijonin më shumë nga kjo substancë ishin më tërheqës për mushkonjat.
Për më tepër, ekspertët kanë zbuluar se konsumimi i birrës rrit rrezikun e pickimeve. Birra rrit temperaturën e trupit, sasinë e dioksidit të karbonit të nxjerrë dhe ndikon në aromat e lëkurës, duke e bërë individin më të dukshëm për insektet.
Një studim i realizuar në Holandë me 465 pjesëmarrës ka treguar se ata që kishin konsumuar birrë brenda 24 orëve të fundit ishin rreth 35 përqind më tërheqës për mushkonjat se ata që nuk kishin pirë alkool.
Studiuesit tërheqin vëmendjen se kuptimi i këtyre mekanizmave bëhet gjithnjë e më i rëndësishëm, sidomos në kontekstin e ndryshimeve klimatike, të cilat po favorizojnë përhapjen e llojeve të mushkonjave që transmetojnë sëmundje të rrezikshme si malaria, dengue dhe chikungunya.
Si masë mbrojtëse, ekspertët rekomandojnë përdorimin e repelentëve, veshjen e rrobave që mbulojnë trupin, aplikimin e rrjetave kundër mushkonjave dhe kufizimin e konsumit të alkoolit gjatë periudhave me shumë insekte.
