Skuadrat shqiptare tashmë kanë zbuluar emrat e mundshëm të kundërshtarëve për raundin e dytë të kualifikimit në UEFA Conference League, nëse arrijnë të sigurojnë kalimin nga raundi i parë.
Vllaznia, nëse kalon Malishevën, do të përballet me ekipin skocez Hibernian FC në raundin e dytë të këtij kompeticioni.
Ndërkohë, AF Elbasani, nëse arrin të eliminojë BATE Borisov, do të ndeshet me ekipin zviceran FC Sion.
Përsa i përket Dinamo City, nëse kalon Astanën, do të jetë përballë fituesit të duelit mes FC Sheriff dhe NK Aluminij.
Po ashtu, Egnatia, nëse dështon të kalojë Petrocubin në raundin e parë të UEFA Champions League, do të vazhdojë aventurën e saj europiane në raundin e dytë të UEFA Conference League. Në këtë rast, kampionët shqiptarë do të ndeshen me humbësin e përballjes ndërmjet FK Borac Banja Luka dhe PFC Levski Sofia.
Ndeshjet e raundit të dytë të kualifikuesve në UEFA Conference League janë parashikuar të zhvillohen më 23 dhe 30 korrik.