Presidenti francez Emmanuel Macron shpalli se një operacion i përbashkët për rihapjen e Ngushticës së Hormuzit mund të fillojë brenda dy ose tre ditësh. Kjo deklaratë erdhi pas njoftimit mbi arritjen e një marrëveshjeje midis Shteteve të Bashkuara dhe Iranit për të përfunduar luftën.
Gjatë një prononcimi në samitin e G7 në Francë, Macron theksoi se Mbretëria e Bashkuar dhe Franca janë “të gatshme të veprojnë shpejt” për të rikthyer lirinë e lundrimit në atë ngushticë.
Sipas tij, operacioni do të përfshijë dërgimin e avionëve, fregatave dhe specialistëve për asgjësimin e minave në zonën përkatëse.
“Në dispozicion kemi edhe aeroplanmbajtësen tonë, Charles de Gaulle, e cila ka të gjitha pajisjet mbështetëse dhe që është e pranishme në zonë. Ajo mund të vendoset brenda dy ose tre ditësh nga konfirmimi [i marrëveshjes]”, shpjegoi Macron.
Ai shtoi se ky operacion do të zhvillohet në bashkëpunim me Shtetet e Bashkuara dhe “paralelisht me iranianët”, me qëllim që “rihapja e Hormuzit të realizohet në një mënyrë paqësore dhe të qëndrueshme”.
