310 milionë lekë për restaurimin e kopshtit “Ton Alimhilli”/ Benet Beci dhe Ermira Teliti nuk mbajnë premtimin, fëmijët ende pa kopsht

Një tjetër rast i keqmenaxhimit të investimeve publike në Shkodër mban firmën e drejtuesve Benet Beci dhe Ermira Teliti. Këtë herë bëhet fjalë për kopshtin “Ton Alimhill”, në lagjen Rus, ku pavarësisht tenderimit të 310 milionë lekëve për restaurimin e godinës, punimet ende nuk kanë përfunduar.

Sipas afateve të përcaktuara, restaurimi duhej të përfundonte brenda gjashtë muajve, konkretisht deri më 30 qershor 2026. Familjet e zonës ishin njoftuar se kopshti do të hapej në shtator të këtij viti, por tashmë jemi në nëntor dhe godina vijon të jetë e papërfunduar. Premtimi për rihapjen në shtator ka mbetur vetëm në letër, ndërsa prindërit nuk kanë një përgjigje se kur do të mund t’i çojnë fëmijët në kopshtin e tyre.

Por pikëpyetjet nuk ndalen vetëm te vonesa e punimeve. Plot 310 milionë lekë janë tenderuar për restaurimin e një godine ekzistuese, një shumë që ngre pikëpyetje edhe për koston e këtij investimi. Me këtë fond mund të ndërtoheshin dy kopshte të reja, ndërsa këtu as restaurimi i një godine të vetme nuk po përfundon brenda afatit të kontraktuar.

Afati ka kaluar, premtimi për hapjen nuk është mbajtur dhe familjet e lagjes Rus vijojnë të përballen me mungesën e një shërbimi thelbësor për fëmijët e tyre.

Kush mban përgjegjësi për mosrespektimin e afatit? Ku shkuan 310 milionë lekët e tenderuara dhe kur do të përfundojnë realisht punimet?

Në Shkodër, investimet publike duket se kanë një problem të përsëritur: tenderat shpallen, fondet parashikohen, por projektet vonohen dhe qytetarët mbeten në pritje. Rasti i kopshtit “Ton Alimhill” është një tjetër shembull që kërkon transparencë dhe llogaridhënie nga drejtuesit vendorë.

Për familjet e lagjes Rus, ndërkohë, mbetet vetëm një shpresë: që kopshti të jetë gati të paktën në vitin 2027. Sepse 310 milionë lekë janë tenderuar, por ajo që u duhet prindërve dhe fëmijëve është një kopsht funksional, jo një tjetër investim i mbetur në gjysmë.

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu

Të fundit

Më të lexuara

Lexo edhe