Një konflikt i nisur në rrjetet sociale rrezikoi të përfundonte në një përleshje të rëndë mes të miturve në zonën e Kombinatit në Tiranë.
Sipas të dhënave paraprake, bëhet fjalë për 28 djem të moshave 13 deri në 17 vjeç, të cilët dyshohet se ishin organizuar në grupe për t’u takuar dhe për t’u përballur fizikisht. Sherri, që besohet se ka nisur për motive personale, ishte përshkallëzuar përmes komunikimeve dhe postimeve në TikTok.
Policia mori informacion në rrugë operative se të rinjtë kishin përcaktuar vendin dhe kohën e takimit. Menjëherë pas sinjalizimit, efektivë të Komisariatit nr. 6, së bashku me Forcat e Posaçme “Shqiponja”, shkuan në rrugën “Llambi Bonata”.
Të miturit u gjetën të shpërndarë në disa grupe. Gjatë kontrolleve, policia konstatoi se disa prej tyre mbanin mjete të mprehta dhe sende që mund të përdoreshin gjatë një përleshjeje.
Në cilësinë e provës materiale u sekuestruan të paktën pesë thika, kaçavida dhe disa maska. Të 28 të rinjtë u shoqëruan në Komisariatin nr. 6 për veprime të mëtejshme procedurale.
Ndërhyrja e policisë bëri të mundur parandalimin e përplasjes, e cila, duke pasur parasysh moshën e të përfshirëve dhe mjetet që dyshohet se kishin me vete, mund të kishte pasoja të rënda.
