Janë bërë 11 ditë që nga zhdukja e Eglant Koçit, 34 vjeçarit, dhe policia e Tiranës ende nuk ka arritur të gjejë asnjë gjurmë të tij.
Pas shqyrtimit të provave, hetuesit besojnë se ai mund të jetë vrarë nga shoku i tij, Armando Shakaj. Krimi dyshohet se ka ndodhur brenda një zyre në Bulevardin “Zhan D’Ark”.
Eglant Koçi u zhduk më 4 qershor dhe është parë për herë të fundit në afërsi të sheshit “Willson” në kryeqytet, ndërsa udhëtonte me motorin e tij me targa “CT969”. Policia gjithashtu ka identifikuar disa episode të lëvizjes së tij me motor nëpër Tiranë përmes kamerave të sigurisë.
Koçi ishte i punësuar në një mobileri, por hetuesit dyshojnë se ai ishte i përfshirë në aktivitetin e kriptomonedhave, një nga pistat hetimore që policia po shqyrton. Megjithatë, deri tani, fati i 34-vjeçarit mbetet i paqartë, ndërsa operacionet për gjetjen e tij dhe për identifikimin e të dyshuarit kryesor, Armand Shakaj, vazhdojnë.
