Numri i të vdekurve është rritur në 44, një ditë pasi një traget i mbingarkuar u përmbys në liqenin Kariba të Zimbabvesë, tha policia.
Policia tha në rrjetin social X se trupat u nxorën nga një liqen që ndodhet në kufirin midis Zimbabvesë dhe Zambisë .
Megjithatë, policia nuk ka publikuar shifra të reja mbi numrin e të plagosurve ose të zhdukurve pas aksidentit të djeshëm që përfshiu një traget të operuar nga një agjenci shtetërore.
Trageti u përmbys ndërsa mbante të paktën 114 pasagjerë të rritur dhe pesë anëtarë të ekuipazhit, tha Agjencia e Menaxhimit të Fatkeqësive të Zimbabvesë.
Agjencia deklaroi dje se 77 persona u shpëtuan.
Nuk dihet saktësisht se sa persona ishin në traget, sepse në shifër përfshihen vetëm pasagjerët që blenë bileta, ndërsa mund të ketë pasur edhe fëmijë në bord që nuk ishin mjaftueshëm të rritur për të pasur një biletë.
Transmetuesi shtetëror ZBC raportoi se midis të vdekurve kishte fëmijë, megjithëse autoritetet nuk dhanë menjëherë detaje të mëtejshme.
Sipas autoriteteve, trageti ka një kapacitet për 90 persona. Ai përdoret për të transportuar banorët e komuniteteve rurale përreth liqenit në qytetin Kariba, i cili ndodhet në bregdet.
Kariba është liqeni artificial më i madh në botë për nga vëllimi dhe u krijua në fund të viteve 1950 dhe fillim të viteve 1960 nga ndërtimi i një dige në lumin Zambezi. Sot, liqeni gjigant është më shumë se 200 kilometra i gjatë dhe në disa vende deri në 40 kilometra i gjerë.
Kufiri zyrtar midis Zimbabvesë dhe Zambisë kalon nëpër mes të liqenit.
