Shkrimtari Zija Vukaj ka reaguar me tone të forta ndaj zhurmave të krijuara nga motoçikletat në qytetin e Shkodrës gjatë mbrëmjes së 9 majit 2026, duke e cilësuar situatën si një “ndotje të dhunshme akustike”.
Përmes një shkrimi ne facebook, Vukaj përshkruan atmosferën e krijuar në qytet si shqetësuese për banorët, sidomos për të moshuarit dhe personat me probleme shëndetësore.
Ai shprehet se “krisma të pamëshirshme” kanë pushtuar çdo skutë të qytetit, ndërsa buçimat e motoçikletave kanë zëvendësuar qetësinë dhe tingujt karakteristikë të jetës në Shkodër.
Sipas tij, zhurmat kanë ndikuar jo vetëm tek qytetarët, por edhe tek ambienti, duke larguar tufat e zogjve që strehoheshin në pemët e qytetit.
“Një ndotje e dhunshme akustike po përjetojnë qytetarët e pafajshëm të qytetit të Shkodër. Krisma të pamëshirshme, zemërçjerrëse, kanë pushtuar çdo skutë të qytetit. Tufa zogjsh që strehoheshin nëpër pemë kanë marrë arratinë. Taborre të sëmurësh me zemër kanë shtuar dozën e qetësuesve. Buçimat e llahtarshme të motoçikletave të përbindshme shumëkubikëshe kanë zëvendësuar tingujt e butë të jetës së qytetit që prodhon vetëm muzikë. Llahtari sonte, më 9 maj të vitit 2026.”
