Qendërmbrojtësi shkodran Xhulian Kapllanaj do ta vijojë karrierën jashtë Shqipërisë. 24-vjeçari është zyrtarizuar si lojtari më i ri i Bashkimit, skuadër që garon në elitën e futbollit të Maqedonisë së Veriut.
Kapllanaj vjen te klubi i ri pas një sezoni të kaluar me Shirokën në Kategorinë e Dytë shqiptare. Tashmë, mbrojtësi ka zgjedhur një sfidë të re, duke iu bashkuar kampionatit maqedonas.
Bashkimi e ka prezantuar afrimin e shkodranit si pjesë të përforcimeve për sezonin 2026-2027. Kapllanaj pritet të jetë një alternativë e rëndësishme në repartin e mbrojtjes, falë fizikut dhe paraqitjeve të tij në qendër të prapavijës.
Ky transferim përbën një mundësi të re për futbollistin shkodran, i cili synon të fitojë më shumë eksperiencë dhe të bëjë hapin e radhës në karrierën e tij.
Sezoni i ri tashmë ka nisur për Bashkimin, ndërsa Kapllanaj pritet të jetë pjesë e formacionit të skuadrës në ndeshjet e kampionatit.
