Vllaznia do të zbresë edhe pasditen e sotme në fushën e stadiumit të kampingut slloven ku është duke zhvilluar fazën përgatitore, për të zhvilluar një tjetër ndeshje miqësore. Këtë herë ajo do të ndeshet me skuadrën nënkampione të Sllovenisë FC Koper.
Miqësorja do të nisë në orën 18:00 dhe do t’u shërbejë të dy ekipeve në përgatitjet e tyre për ndeshjet e Conference League ku ato do të marrin pjesë.
Në ndeshjen e sotme pritet që trajneri Martini gradualisht të fillojë të mendojë për të hedhur në fushë formacionin titullar, atë me të cilin mund të luajë në përballjen e pas 12 ditëve ndaj Malishevës.
Kujtojmë që deri tani Vllaznia ka zhvilluar dy ndeshje miqësore. Të parën e humbi 0-4 me sllovenët e Olimpia Ljubjana, ndërsa të dytën e fituan 6-3 ndaj ekipit kroat NK Rudes. Sot do të jetë një test serioz për të parë gjendjen e kuqebluve vetëm pak ditë para sfidës së tyre të parë europiane.
Burimi: Gazeta “SHKODRA SPORT”
