Policia amerikane ka bërë të ditur se një incident me të shtëna zjarri në Universitetin Shtetëror të Virxhinias të shtunën ka lënë disa persona të plagosur, ndërsa autoritetet janë ende në kërkim të disa të dyshuarve që mbeten në arrati.
Ngjarja ndodhi në kampusin që ndodhet rreth 32 kilometra në jug të Richmondit. Policia publikoi informacionet e para në lidhje me të shtënat teksa kampusi u vendos në izolim.
“Një të shtënë ndodhi në zonën e Anekseve Quad ku u përfshinë disa viktima, të cilët u transportuan në spitalet e zonës. Policia është në vendngjarje dhe ju kërkon që të shmangni zonën”, tha departamenti i policisë së VSU-së në një deklaratë .
Sipas universitetit, në incident ishin të përfshirë “disa të dyshuar” dhe, sipas të dhënave fillestare, asnjëri nga të plagosurit nuk është në gjendje që rrezikon jetën.
Agjencia lokale e lajmeve WTVR, duke iu referuar burimeve zyrtare, bëri të ditur se pesë persona janë plagosur. Policia e Chesterfield njoftoi WTVR se autoritetet reaguan në konviktet e universitetit rreth orës 1:30 të mëngjesit.
SHBA-të vazhdojnë të regjistrojnë një numër të lartë të të shtënave masive, shumë prej tyre të ndodhura në mjedise universitare apo aktivitete shkollore.
Këta tregues kanë shtuar kërkesat për rritje të kontrollit federal ndaj armëve të zjarrit, ndonëse Kongresi nuk ka marrë masa të konsiderueshme kufizuese ndër vite.
