Një aksident i rëndë rrugor ka ndodhur në segmentin nacional Pushimi i Shoferit–Fier Shegan, pranë daljes së fshatit Rrupaj. Informacionet e para tregojnë se dy automjete janë përfshirë në përplasje, pasi një automjet me targa greke dyshohet se ka tentuar një parakalim të rrezikshëm të një makine me targa italiane.
Për shkak të kësaj manovre, automjeti italian ka devijuar nga rruga dhe është përmbytur në kanal. Në të ndodheshin tre persona – një çift dhe djali i tyre i rritur – të cilët u transportuan me dy ambulanca drejt Spitalit të Lushnjës për ndihmë mjekësore të menjëhershme.
Policia mbërriti në vendngjarje dhe po kryen hetimet për sqarimin e plotë të rrethanave të aksidentit, ndërkohë që po kujdeset për rregullimin e trafikut në zonë.
Ky segment rrugor prej kohësh cilësohet problematik, për shkak të gjerësisë së ngushtë dhe trafikut të lartë, duke shënuar shpesh ngjarje të tilla aksidentale.
