Sot në Malishevë është raportuar një incident serioz, ku një autobus është goditur me armë zjarri në fshatin Pagarushë.
Zëdhënësja e Policisë për rajonin e Gjakovës, Vlera Krasniqi, ka konfirmuar këtë ngjarje.
‘‘Rreth orës 12:10, kemi marrë një njoftim për një sulm me armë zjarri ndaj një autobusi në fshatin Pagarushë, ku menjëherë janë dërguar njësitë përkatëse policore në vendngjarje’’, ka deklaruar Policia.
Po ashtu, është bërë e ditur se personi i dyshuar për sulmin është arrestuar, ndërsa një armë zjarri e tipit AK-47 është sekuestruar.
‘’Si pasojë, i dyshuari është marrë në arrestim dhe, në bashkëpunim me prokurorin e shtetit, është ndaluar për një periudhë prej 48 orësh. Armë e llojit AK-47 është gjithashtu e sekuestruar. Fatmirësisht, nga ky incident nuk ka pasur të lënduar, ndërsa rasti është regjistruar si “Vrasje e rëndë në tentativë” dhe aktualisht është duke u hetuar’’, raporton Policia.
