Pas sulmeve të fundit ndaj një anijeje të dytë, raportimet nga mediat lokale bëjnë të ditur se “të gjithë anëtarët e ekuipazhit janë mirë”. Deri tani, autoritetet bullgare nuk kanë prezantuar prova përfundimtare që të identifikojnë autorët e sulmeve të së dielës.
Kryeministri i Bullgarisë ka njoftuar se do të ftojë ambasadoren ruse për konsultime dhe do të vendosë në dijeni sekretarin e përgjithshëm të NATO-s, Mark Rutte.
“Kjo është absolutisht e papranueshme, një tjetër sulm në afërsi të ujërave territoriale bullgare. Përfaqësuesi ynë i përhershëm në NATO dhe përfaqësuesi ynë i përhershëm në Bashkimin Evropian janë njoftuar. Bullgaria vazhdon të kërkojë ndihmë për hetimin. Tashmë janë goditur tri anije dhe duhet të përcaktojmë me saktësi se cili shtet mban përgjegjësinë për dronët që godasin mjete lundruese kaq pranë ujërave territoriale bullgare”
Edhe më herët, më 6 tetor rreth orës 03:00 të mëngjesit, dy anije tregtare u goditën me dronë në zonën ekskluzive ekonomike të Bullgarisë në Detin e Zi, afërsisht 130 kilometra larg nga bregu.
Për këtë incident, presidenti ukrainas Volodymyr Zelensky ia atribuoi përgjegjësinë Rusisë. Nga ana e saj, Bullgaria deklaroi se vijon hetimet për të përcaktuar prejardhjen e dronëve.
Si një vend anëtar i NATO-s, Bullgaria ndodhet në qendër të vëmendjes lidhur me sigurinë detare dhe marrëdhëniet ndërmjet Rusisë, Ukrainës dhe aleatëve të NATO-s.
