Prestigjiozja gjermane SPIEGEL i ka kushtuar një artikull të gjatë protestave të zhvilluara në Tiranë kundër projektit të ndërtimit të një resorti luksoz në zonën e mbrojtur të Nartës, duke raportuar për përplasjet mes protestuesve dhe policisë, arrestimet dhe të plagosurit.
Sipas artikullit, zemërimi i qytetarëve tashmë shkon përtej kundërshtimit të projektit të ndërtimit, duke u shndërruar në një protestë më të gjerë kundër qeverisë së kryeministrit Edi Rama.
Media gjermane shkruan se protestuesit u përpoqën të bllokonin hyrjen e Parlamentit, ndërsa hodhën vezë dhe miell ndaj efektivëve të policisë.
Forcat e rendit reaguan me automjete me ujë nën presion dhe sprej me piper për të shpërndarë turmën.
Sipas raportimit, projekti parashikon ndërtimin e hoteleve luksoze, vilave dhe objekteve rekreative në Gjirin e Zvërnecit dhe në ishullin e Sazanit. Investimi udhëhiqet nga një kompani e Jared Kushner, dhëndrit të presidentit amerikan Donald Trump.
SPIEGEL thekson se organizatat mjedisore paralajmërojnë se zhvillimi i projektit mund të shkaktojë dëme të pakthyeshme në ekosistemin e ndjeshëm të deltës së lumit Vjosa dhe lagunës së Nartës, habitat i flamingove, çafkave dhe shumë llojeve të tjera të shpendëve.
Artikulli vëren se protestat, të cilat zhvillohen prej më shumë se një muaji, janë pagëzuar nga mediat si “Revolucioni i Flamingove”, me flamingon që është kthyer në simbolin e lëvizjes.
Sipas agjencisë shtetërore shqiptare ATA, të cituar nga SPIEGEL, gjatë protestës së fundit u shoqëruan përkohësisht 18 persona, ndërsa 15 efektivë policie dhe katër protestues morën ndihmë mjekësore pas lëndimeve të pësuara.
Protestuesit kërkojnë edhe dorëheqjen e kryeministrit Edi Rama, duke shprehur dyshime se mbështetja e qeverisë për projektin lidhet me korrupsionin.
Nga ana tjetër, Rama pretendon se ende nuk është dhënë leja e ndërtimit, megjithëse shfaqja e makinerive në fund të muajit maj në zonën ku parashikohet investimi ndezi valën e protestave që vazhdon edhe sot.
