Një grua në Turqi është përballur me pasoja serioze shëndetësore pas një sulmi të papritur jashtë një supermarketi në Nevşehir. Policia arrestoi një 38-vjeçar, i identifikuar si Tolga Çelik, i cili akuzohet se e ka goditur gruan me inicialet S.E. në vesh, duke i shkaktuar humbje dëgjimi në veshin e majtë.
Incidenti ndodhi në lagjen Kapucubaşı, ku Çelik iu afrua nga pas viktimës dhe e goditi me shuplakë në veshin e majtë. Ngjarja u kap nga kamerat e sigurisë së zonës, të cilat fiksuan çastin kur ndodhi sulmi.
Menjëherë pas ngjarjes, gruaja njoftoi policinë dhe paraqiti kallëzim ndaj të dyshuarit. Çelik, gjatë marrjes në pyetje nga oficerët, ka mohuar se sulmi ishte i qëllimshëm, duke deklaruar se “krahu i tij e kishte prekur pa dashje” dhe se kontakti ishte aksidental.
Megjithatë, ekzaminimet mjekësore konfirmuan humbjen e dëgjimit në veshin e majtë të S.E. Sipas raportit të mjekëve, dëmtimi ishte aq i rëndë sa nuk mund të korrigjohej me një procedurë të thjeshtë, por nuk rrezikonte jetën e saj.
Policia, pasi përfundoi hetimet fillestare, transferoi çështjen në gjykatë. Autoritetet gjyqësore vendosën të arrestojnë 38-vjeçarin, i cili u dërgua në burg. Në të njëjtën kohë, pamjet nga kamerat e sigurisë mbeten dëshmi kryesore e incidentit.