Një lajm i rëndë ka prekur sportin shkodran. Ish-basketbollisti dhe trajneri i njohur, Fatjon Taraboshi, është ndarë nga jeta në moshën 39-vjeçare, duke lënë pas një kontribut të çmuar në basketbollin e qytetit.
Prej një periudhe të gjatë ai po përballej me probleme serioze shëndetësore. Në përpjekje për të përmirësuar gjendjen e tij, Taraboshi iu nënshtrua edhe një ndërhyrjeje të vështirë kirurgjikale në Itali. Për ta mbështetur në këtë betejë, miq, sportdashës dhe qytetarë u angazhuan në një fushatë solidariteti për mbulimin e shpenzimeve të trajtimit dhe medikamenteve.
Gjatë karrierës së tij, Taraboshi ishte një nga emrat e spikatur të basketbollit shkodran, duke fituar titull kampion me ekipin e Vllaznisë. Pas përfundimit të karrierës si lojtar, ai vijoi të kontribuonte për sportin edhe në rolin e trajnerit.
Vetëm pak javë më parë, ai ishte nderuar publikisht për përkushtimin dhe kontributin e dhënë ndër vite në zhvillimin e basketbollit në Shkodër. Ndarja e tij nga jeta përbën një humbje të madhe për familjen, miqtë dhe komunitetin sportiv shkodran.
