Pagat mesatare në Evropë vijojnë të shfaqin diferenca të mëdha nga një vend në tjetrin, duke reflektuar nivelin e zhvillimit ekonomik, produktivitetin, kostot e jetesës dhe strukturën e tregut të punës.
Sipas raportit më të fundit “Taxing Wages 2026” të OECD-së, paga mesatare bruto vjetore në kontinent varion nga rreth 18,590 euro në Turqi deri në mbi 107 mijë euro në Zvicër.
Në krye të listës renditet Zvicra, me një pagë mesatare bruto vjetore prej 107,487 eurosh, duke qenë i vetmi shtet Evropian që kalon pragun e 100 mijë eurove. Pas saj vijnë Islanda me 85,950 euro dhe Luksemburgu me 77,844 euro, që mban vendin e parë mes shteteve të Bashkimit Evropian.
Në grupin e vendeve me paga më të larta renditen gjithashtu Danimarka me 71,961 euro, Holanda me 69,028 euro dhe Norvegjia me 68,420 euro. Ndërkohë, Gjermania regjistron një pagë mesatare prej 66,700 eurosh në vit, ndërsa Mbretëria e Bashkuar arrin në 65,340 euro.
Në anën tjetër të renditjes qëndrojnë vendet e Evropës Qendrore dhe Lindore. Slovakia rezulton vendi me pagën më të ulët në Eurozonë, me rreth 19,590 euro në vit. Pas saj renditen Hungaria, Letonia dhe Çekia, por që kanë monedhat e tyre.
Sa është paga mesatare në Shqipëri?
Edhe pse Shqipëria nuk përfshihet në raportin e OECD-së, të dhënat më të fundit të INSTAT tregojnë se paga mesatare mujore bruto në vend ka vijuar të rritet gjatë vitit 2025.
Sipas publikimit zyrtar të INSTAT, në tremujorin e katërt të vitit 2025 paga mesatare mujore bruto për një të punësuar me pagë në Shqipëri arriti në 86,984 lekë, me një rritje prej 4.3% krahasuar me të njëjtën periudhë të vitit 2024.
Nëse kjo pagë përllogaritet në bazë vjetore dhe konvertohet në euro, niveli mesatar i pagës bruto në Shqipëri llogaritet rreth 10,900 euro në vit, disa herë më i ulët se mesatarja e vendeve të Bashkimit Evropian dhe shumë larg niveleve të Evropës Perëndimore.
Megjithëse pagat në Shqipëri kanë shënuar rritje vitet e fundit, hendeku me vendet më të zhvilluara Evropiane mbetet i konsiderueshëm. Një punonjës mesatar në Gjermani apo Holandë fiton brenda një muaji sa një punonjës shqiptar në disa muaj punë.
Megjithatë, raportet ndërkombëtare nënvizojnë se kur pagat maten sipas fuqisë blerëse reale, diferencat mes vendeve Evropiane ngushtohen disi, pasi kostot e jetesës në vendet me paga më të ulëta janë përgjithësisht më të reduktuara.
