Këndi i ri i lojërave në lagjen Xhabije të Shkodrës është kthyer në objekt debati, pas kritikave të këshilltares demokrate në Këshillin Bashkiak, Gloria Shllaku.
Përmes një postimi në rrjetet sociale, Shllaku ka publikuar disa fotografi nga këndi i lojërave, ku pretendon se janë konstatuar dëmtime vetëm pak ditë pas inaugurimit. Në pamjet e publikuara prej saj shihen dërrasa të dëmtuara dhe vida të dala në disa prej strukturave.
Këshilltarja ngre shqetësimin për cilësinë e punimeve dhe sigurinë e fëmijëve që përdorin hapësirën, duke e lidhur situatën me investimet e Bashkisë Shkodër në këndet e lojërave dhe hapësirat publike.
Shllaku shprehet se gjatë këtyre tre viteve të administrimit të qytetit ka kërkuar në mënyrë të përsëritur informacion dhe llogari në Këshillin Bashkiak për investimet e parashikuara në buxhet.
Sipas saj, qytetarët duhet të shohin investime funksionale dhe të qëndrueshme, ndërsa jo vetëm momente inaugurimi.
Në reagimin e saj, këshilltarja kërkon që hapësirat për fëmijët të plotësojnë standardet e sigurisë dhe të jenë të përshtatshme për përdorim.
Kritikat e Shllakut vijnë bazuar në fotografitë e publikuara prej saj, ndërsa mbetet për t’u parë nëse Bashkia Shkodër do të reagojë lidhur me gjendjen e këndit të lojërave dhe nëse do të ndërhyjë për riparimin e dëmtimeve të konstatuara.
