Një tjetër sukses sportiv vjen për Shkodrën. Ekipi i vajzave në volejboll i gjimnazit Gjimnazi “28 Nëntori” është shpallur nënkampion i Shqipërisë në kampionatin kombëtar të organizuar nga Komiteti Olimpik Kombëtar Shqiptar, duke sjellë një rezultat të rëndësishëm për sportin shkollor në qytet.
Pas një rrugëtimi disa mujor me ndeshje dhe eliminime përballë skuadrave nga e gjithë vendi, vajzat shkodrane arritën deri në finalen e madhe, ku u përballën me ekipin e Tiranës.
Me përkushtim, disiplinë dhe shpirt gare, skuadra e “28 Nëntorit” tregoi nivel të lartë loje gjatë gjithë kampionatit, duke u renditur mes ekipeve më të mira në Shqipëri dhe duke përfaqësuar denjësisht Shkodrën në këtë aktivitet kombëtar.
Meritë për këtë arritje ka edhe puna e mësueses së edukimit fizik Klodeta Zhivani, e cila ka udhëhequr dhe mbështetur ekipin përgjatë gjithë rrugëtimit sportiv.
Lajmi është bërë publik nga vetë gjimnazi “28 Nëntori”, ndërsa suksesi i vajzave është pritur me vlerësime dhe urime të shumta nga komuniteti shkollor dhe sportdashësit në Shkodër.
