Në Shkodër është përkujtuar sërish 17-vjeçari Pëllumb Pëllumbi, i njohur si martir i demokracisë, i cili humbi jetën më 16 qershor të vitit 1990 gjatë tentativës për të kaluar kufirin.
Në ceremoninë përkujtimore morën pjesë përfaqësues të shoqatës së të përndjekurve politikë, të cilët e cilësuan kujtimin e tij si një detyrim moral ndaj historisë së diktaturës dhe viktimave të saj. Ata u ndalën edhe te zhvillimet e fundit në vend, duke theksuar se liria kërkon vendosmëri dhe angazhim të vazhdueshëm, ndërsa shprehën besim tek brezi i ri për ndërtimin e së ardhmes.
Ish-të burgosur politikë, nga ana e tyre, vlerësuan protestat që po zhvillohen në Tiranë dhe ngritën shqetësimin për emigrimin e të rinjve, duke bërë thirrje që vendi të mos braktiset.
Pëllumb Pëllumbi u vra 36 vite më parë teksa përpiqej të largohej nga vendi në kërkim të një jete më të mirë, në rrethana të cilat mbeten simbol i dhunës së regjimit të asaj kohe.
