Në ambientet e Drejtorisë Vendore të Policisë Shkodër është zhvilluar një takim me 22 kursantë të cilët kanë nisur praktikën profesionale për rolin bazë “Patrullë e Përgjithshme” në strukturat e Policisë së Shtetit.
Në këtë aktivitet morën pjesë zëvendësdrejtori për Sigurinë Publike në DVP Shkodër, Drejtues Akil Kalo, pedagogë të Kolegjit Profesional të Formimit Policor në Akademinë e Sigurisë, specialisti i trajnimeve pranë DVP Shkodër, si dhe shefja e Burimeve Njerëzore për Kufirin dhe Migracionin Shkodër.
Gjatë bashkëbisedimit me kursantët e rinj, zëvendësdrejtori Kalo i inkurajoi ata për nisjen e kësaj etape të rëndësishme profesionale, duke theksuar se rruga që kanë zgjedhur kërkon përkushtim, integritet dhe ndjenjë të lartë përgjegjësie.
Ai nënvizoi gjithashtu se shërbimi në radhët e Policisë së Shtetit nuk përfaqëson vetëm një profesion, por një mision për garantimin e rendit dhe sigurisë publike, që duhet përmbushur me profesionalizëm dhe devotshmëri ndaj qytetarëve.
Në përfundim të takimit, 22 kursantëve iu uruan suksese në rrugëtimin e tyre profesional, duke iu garantuar mbështetje dhe asistencë të vazhdueshme gjatë periudhës së praktikës në strukturat e DVP Shkodër.
