Turistët në zonën Qafë Thore–Theth këtë mëngjes nuk u kufizuan vetëm në rolin e vizitorëve; ata dolën në rrugë dhe bashkëpunuan si vullnetarë për të ndihmuar pas rrëshqitjes së gurëve dhe dherave që kishte bllokuar përkohësisht lëvizjen në këtë aks rrugor.
Incidenti ndodhi në orët e para të ditës, kur sasi të mëdha dherash dhe gurësh zbritën në rrugë, duke ndërprerë qarkullimin.
Turistët, të cilët u përfshinë në largimin e materialeve që pengonin rrugën, dhanë një shembull të veçantë bashkëpunimi, duke kontribuar vullnetarisht për rikthimin e qarkullimit.
Si rezultat i ndërhyrjes së shpejtë të ekipeve përkatëse dhe kontributit të turistëve, rruga u bë sërish e kalueshme në pak kohë dhe aktualisht lejon qarkullimin e të gjitha mjeteve.
Kjo iniciativë e turistëve është përshëndetur nga banorët dhe të pranishmit në zonë, të cilët e konsiderojnë si dëshmi se bashkëpunimi dhe solidariteti janë thelbësorë për përballimin e situatave të papritura, veçanërisht në një prej destinacioneve më të njohura turistike në vend.
