Administrata e presidentit Donald Trump planifikon të vendosë sanksione të gjera kundër Gjykatës Penale Ndërkombëtare (ICC), sipas një raportimi të “Wall Street Journal”, i cili i referohet dokumenteve të shqyrtuara nga gazeta dhe deklaratave të zyrtarëve amerikanë.
Këto masa të planifikuara do të ndalonin pjesën më të madhe të transaksioneve me ICC-në, pas një periudhe tranzicioni prej gjashtë deri në shtatë muaj. Sipas të dhënave të WSJ-së, këto kufizime mund të pengojnë rëndë funksionimin e gjykatës, duke përfshirë përdorimin e dollarit amerikan dhe qasjen në pjesë të sistemit financiar ndërkombëtar.
Një vendim përfundimtar ende nuk është marrë dhe nuk është bërë asnjë shpallje zyrtare. Disa zyrtarë amerikanë i thanë WSJ-së se sanksionet mund të konkretizohen gjatë javës kur mbahet Asambleja e Përgjithshme e OKB-së, ose menjëherë pas saj.
Marrëdhëniet midis Uashingtonit dhe ICC-së janë përkeqësuar pas lëshimit nga gjykata, në vitin 2024, të urdhër-arresteve për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, lidhur me akuza për krime lufte dhe krime kundër njerëzimit në Gaza. Netanyahu dhe Gallant i kanë hedhur poshtë të gjitha akuzat.
Sekretari amerikan i Shtetit, Marco Rubio, ka kritikuar ashpër veprimet e ICC-së, duke theksuar se veprimet e gjykatës kundër zyrtarëve të vendeve që nuk janë anëtare përbëjnë “kërcënim për sovranitetin amerikan”. SHBA-ja dhe Izraeli nuk janë palë nën Statutin e Romës.
