Një mjek 91-vjeçar është paditur nga një grua 71-vjeçare, e cila e akuzon se në vitin 1982, gjatë një procedure të inseminimit artificial, ka përdorur spermën e tij për të ngjizur djalin e saj pa dijeninë ose miratimin e saj. Për më shumë se 40 vjet, Mary Ellen Lukezick kishte jetuar me bindjen se djali i saj ishte fryt i spermës së një dhuruesi anonim, i përshkruar në atë kohë si një student i ri, i shëndetshëm i mjekësisë.
Ndryshimi i madh ndodhi në dhjetor të vitit 2024, kur Joseph Laedtka Heider, sot i moshës 43 vjeç, kreu një test të ADN-së për prejardhje në platformën Ancestry.com. Rezultatet e testit zbuluan lidhje të qarta gjenetike me familjarë të doktorit Frederick Dettmann dhe, sipas padisë së dorëzuar, provuan se Dettmann është babai biologjik i Josephit.
Testi i njëjtë identifikoi edhe nëntë gjysmë-vëllezër të tjerë, duke hapur rrugë për dyshime se nuk është rasti i vetëm. Sipas dokumentacionit gjyqësor, Lukezick ishte paciente e Dettmann në vitin 1982. Për shkak të vështirësive për të mbetur shtatzënë, mjeku i kishte sugjeruar procedurën e inseminimit artificial. Padia është dorëzuar më 6 gusht, dhe avokatët që mbrojnë nënë e bir thonë se gjatë shqyrtimit të rastit kanë dalë dhe gra të tjera me pretendime shqetësuese ndaj mjekut, disa që shtrihen të paktën që nga vitet 1970.
Frederick Dettmann, i cili aktualisht është në pension, i mohon këto akuza përmes përfaqësuesve të tij ligjorë. Rasti ka sjellë në vëmendje edhe një ngjarje të vitit 1985, kur Dettmann u përball me akuza për sulm gjatë një kontrolli gjinekologjik ndaj një pacienteje. Në atë periudhë nuk u ngritën akuza, duke qenë se autoritetet e cilësuan të vështirë mbledhjen e provave të nevojshme. Hetimi dhe procesi gjyqësor që do të pasojë pritet të zbulojnë detaje të reja mbi mënyrën e kryerjes së inseminimit artificial dhe nëse ka pasur edhe raste të tjera të ngjashme.
