Një shpërthim i dyshuar i norovirusit ka prekur mbi 100 pasagjerë dhe rreth 23 anëtarë të ekuipazhit në anijen e kompanisë Princess Cruises, sipas informacionit të ofruar nga Qendrat Amerikane për Kontrollin dhe Parandalimin e Sëmundjeve (CDC).
Anija e quajtur “Ruby Princess” u nis më 12 qershor nga San Francisko me destinacion Alaskën dhe Kanadën, me kthim të planifikuar për më 2 korrik. CDC njoftoi për shpërthimin rreth dy javë pas nisjes, i cili klasifikohet si i tillë kur më shumë se 3% e pasagjerëve preken nga sëmundja. Në këtë udhëtim, anija transportonte 3 mijë e 32 pasagjerë dhe 1 mijë e 144 anëtarë të ekuipazhit.
Anija u ankorua në San Francisko të enjten për t’u dezinfektuar.
Norovirusi është një patogjen shumë ngjitës që shkakton simptoma si diarre dhe të vjella, i cili shpërndahet përmes kontaktit me sipërfaqe të kontaminuara ose përmes ushqimit të infektuar.
Autoritetet shëndetësore këshillojnë për një praktikë të qartë dhe të shpeshtë të larjes së duarve me ujë dhe sapun për të parandaluar përhapjen e infeksionit.
Anijet kroçere janë identifikuar si vende me rrezik të lartë për shpërndarjen e sëmundjeve për shkak të afërsisë së madhe midis pasagjerëve.
Personat e prekur nga virusi janë izoluar, ndërsa procesi i dezinfektimit të anijes vazhdon.
