Me nisjen e sezonit turistik, Shërbimi i Urgjencës pranë Spitalit Rajonal të Lezhës ka rritur nivelin e gatishmërisë për të përballuar fluksin e shtuar të kërkesave për ndihmë mjekësore.
Që prej 1 qershorit është dyfishuar stafi mjekësor, ndërsa në dispozicion janë vendosur dy autoambulanca dhe një motoambulancë. Kjo e fundit, e rikthyer për të dytin vit radhazi, synon të kapërcejë vështirësitë e shkaktuara nga trafiku i rënduar, karakteristik për sezonin veror.
Koordinatori i Shërbimit të Urgjencës, Ledion Prendi, thekson se shtimi i numrit të pushuesve në bregdet ka sjellë edhe një rritje të ndjeshme të thirrjeve për ndihmë mjekësore.
Gjatë muajve të verës, Urgjenca e Lezhës regjistron mbi 1 mijë thirrje, ndaj rritja e kapaciteteve dhe funksionimi i motoambulancës konsiderohen masa të rëndësishme për garantimin e një shërbimi sa më të shpejtë dhe efikas për qytetarët dhe pushuesit në zonën e Shëngjinit.
