Zjarret në bashkinë e Krujës vijojnë të jenë aktive, përkeqësuar nga terreni i ashpër dhe erërat e forta që ndihmojnë përhapjen e flakëve. Strukturat e emergjencave civile, forcat zjarrfikëse dhe trupat e Forcave të Armatosura mbeten në gatishmëri të plotë për t’u përballur me situatën.
Pasditen e sotme është shënuar një riaktivizim i flakëve në lagjen Abaze, pikërisht aty ku dy ditë më parë nisi një vatër që kërcënoi seriozisht qytetin e Krujës. Në vendngjarje janë mobilizuar një numër i madh zjarrfikësish, efektivë ushtarakë si dhe banorë të zonës, të cilët vijojnë përpjekjet për të ndalur përhapjen e zjarrit.
Ndërkohë, vatra në fshatin Halil mbetet ende e pashuar. Ndërhyrja për shuarjen e saj po realizohet në dy drejtime, përmes ndërhyrjes ajrore të helikopterëve të Forcave Ajrore dhe nga toka, ku operacionet vështirësohen ndjeshëm për shkak të terrenit të thyer.
Prefektura e Durrësit bën me dije se situata në Krastë është drejt stabilizimit. Gjatë ditës, rreth 50 ushtarakë të Forcave të Armatosura dhe shërbimet zjarrfikëse janë ndarë në dy grupe për të përforcuar arritjet e natës, kur zjarri u vu përkohësisht nën kontroll.
