Ujësjellës Kanalizime Shkodër ka njoftuar se, për shkak të vijimit të punimeve për ndërtimin e rrjetit të ri të ujësjellësit, furnizimi me ujë do të ndërpritet gjatë natës së 23 korrikut.
Sipas njoftimit zyrtar, ndërprerja do të nisë në orën 23:00 të datës 23.07.2026 dhe do të zgjasë deri në orët e para të mëngjesit të 24.07.2026.
Ndërmarrja u ka bërë thirrje qytetarëve që, edhe pas rikthimit të furnizimit, të mos e përdorin menjëherë ujin për konsum të drejtpërdrejtë. Sipas UK Shkodër, gjatë 24 orëve të para mund të kryhet pastrimi i tubacioneve pas lidhjes së rrjetit të ri me atë ekzistues, ndaj rekomandohet shmangia e konsumit të ujit gjatë kësaj periudhe.
Ujësjellësi Shkodër kërkon mirëkuptimin e qytetarëve, duke theksuar se ndërprerja është e nevojshme për përfundimin e punimeve në rrjetin e ri të furnizimit me ujë.
