Saimir Korreshi, deputet i Partisë Demokratike për Lushnjën, ka denoncuar situatën problematike që, sipas tij, është e lidhur me ndotjen e kanalit vaditës në qytet.
Në një reagim të tij publik, Korreshi theksoi se bidonat plastikë dhe mbeturinat kanë
bllokuar kanalin që kalon nëpër Lushnjë, çka ka sjellë ndotje, erë të padëshirueshme dhe rrezik për shëndetin e banorëve.
“Kur bidonat plastikë dhe mbeturinat pushtojnë dhe bllokojnë kanalin vaditës që kalon përmes Lushnjës, për banorët mund të ketë vetëm erë kërme, mushkonja dhe burim infeksioni”, deklaroi deputeti demokrat.
Ai kërkoi nga qeveria dhe Bashkia e Lushnjës që të ndërmarrin masa për pastrimin e kanalit dhe përmirësimin e kushteve për qytetarët.
“I bëj thirrje Qeverisë dhe Bashkisë: ua ktheni në shërbime taksat qytetarëve! Gjithmonë, nëse s’ju prishim plazhin për ditë të dielë”, shtoi Korreshi.
