Aktori i mirënjohur Robert Ndrenika ka reaguar pas sulmeve dhe komenteve negative që mori pas takimit me kryebashkiakun Erion Veliaj në ambientet e gjykatës. Në një prononcim ekskluziv për Report Tv, Ndrenika është shprehur i habitur nga reagimet e ashpra të një grupi njerëzish dhe politikanësh.
Aktori e ka vlerësuar figurën e Veliajt në nivel personal, duke u shprehur: “E kam bir për shpirt, ia njoh jetën”.
Ndrenika ka zgjedhur të shpërfillë gjuhën e urrejtjes, duke theksuar se nuk i kupton arsyet e këtij reagimi agresiv ndaj tij. Ai konfirmoi se do të jetë sërish pranë tij nëse do të jetë e nevojshme, duke treguar një lidhje emocionale të fortë që tejkalon rrethanat politike.
Ky reagim vjen si një përgjigje direkte ndaj zhurmës mediatike që u krijua pasi aktori u shfaq publikisht në krah të kryebashkiakut gjatë proceseve të tij gjyqësore.
