Shkrimtari dhe publicisti shkodran Stefan Çapaliku ka reaguar në lidhje me debatet që po shoqërojnë protestat e fundit, duke kundërshtuar idenë se qytetarët dalin në tubime vetëm të nxitur nga forca apo interesa të caktuara politike.
Përmes një reagimi publik, Çapaliku sjell në vëmendje shprehjen e aktivistit amerikan John Lewis se “protesta është një akt dashnie”, duke theksuar se përpjekjet për të gjetur gjithmonë “dorën e fshehtë” pas protestave janë shenjë e një mentaliteti provincial.
“Protesta asht nji akt dashnie. Të kërkosh me dijtë se kush qëndron nga mbrapa thirret ‘Dietrologi’, çka asht tipari i parë i provincializmit. Njerëzit dalin se ashtu ia do shpirti dhe s’kanë nevojë me pasë mbrapa askënd që i shtyn”, shprehet Çapaliku.
Me këtë deklaratë, shkrimtari shkodran mbron idenë se pjesëmarrja qytetare në protesta është një shprehje e lirë e ndërgjegjes dhe bindjeve personale, duke refuzuar narrativat që e lidhin automatikisht çdo mobilizim publik me organizime të fshehta apo interesa të caktuara.
