Protesta e zhvilluar të shtunën, më 24 tetor, në kryeqytetin shqiptar ka tërhequr interesin e medias prestigjioze amerikane “Bloomberg”, e cila raporton për përshkallëzimin e kërkesave për dorëheqjen e kryeministrit Edi Rama dhe incidentet mes pjesëmarrësve në protestë dhe Forcave të Rendit.
Siç thekson Bloomberg, këto demonstrata, të drejtuara kryesisht nga studentët, vazhdojnë prej afro dy javësh në Tiranë dhe lidhen me një lëvizje që filloi muaj më parë në kundërshtim të planeve për ngritjen e një resorti luksoz.
Sipas medias amerikane, në tubimin e fundit ishin të pranishëm shumë qytetarë, ndërkohë që studentëve u janë bashkuar dhe pedagogë të universiteteve, arsimtarë, politikanë të opozitës si dhe figura të ndryshme publike.
Bloomberg sjell në vëmendje edhe përplasjet që ndodhën në bulevardin qendror të Tiranës, ku protestuesit hodhën gurë e sende të forta drejt Policisë, ndërsa disa kosha plehrash janë përfshirë nga zjarri. Policia, thuhet në raportimin e tyre, u përgjigj me gaz lotsjellës, topa uji dhe plumba gome, ndërkohë që situata e tensionuar u përhap edhe në pjesë të tjera të kryeqytetit.
Artikulli ndalet edhe te deklarimet e kryeministrit Edi Rama përpara protestës, ku ai ka theksuar se qeveria po hartonte masa në përgjigje të shqetësimeve të ngritura nga qytetarët rreth kostos së jetesës, çështjeve të strehimit dhe mundësive në ekonomi.
Sipas Bloomberg, këto probleme janë të ngjashme me ato që kanë nxitur protesta edhe në Francë.
Raportimi i Bloomberg e rikonfirmon rëndësinë ndërkombëtare të protestës së 24 tetorit, në një periudhë kur tubimet në Tiranë vazhdojnë dhe kërkesat politike ndaj qeverisë sa vijnë e shtohen.
