Kryebashkiaku i Lezhës, Pjerin Ndreu, ka vendosur të publikojë numrin e tij personal të telefonit, duke u bërë thirrje pushuesve të raportojnë çdo rast abuzimi me çmimet apo shkelje të standardeve të shërbimit në bregdetin e Lezhës.
Sipas Ndreut, ky vendim vjen pas, sipas tij, përhapjes së informacioneve të pasakta dhe sulmeve të qëllimshme që synojnë të dëmtojnë imazhin e turizmit në zonat bregdetare të Lezhës, veçanërisht sa i përket pastërtisë, çmimeve dhe aksesit në hapësirat publike.
Bashkia ka vënë në dispozicion edhe numrat e drejtuesve lokalë, ku qytetarët dhe pushuesit mund të dërgojnë mesazhe ose të telefonojnë për të denoncuar çdo shkelje.
Ndërkohë, janë bërë publike edhe tarifat zyrtare të shezlloneve dhe hapësirave në plazhet e Tale, Shëngjinit dhe Ranës së Hedhun. Sipas bashkisë, këto çmime janë të detyrueshme për të gjithë operatorët privatë dhe çdo tarifë më e lartë se ajo e miratuar duhet të denoncohet menjëherë pranë autoriteteve.
Kryebashkiaku u ka bërë apel pushuesve të bashkëpunojnë me institucionet, duke raportuar çdo rast që cenon ligjin, standardet e shërbimit apo interesin e turistëve në bregdetin e Lezhës.
