Në qytetin e Kukësit u përurua memoriali “Sakrifica”, kushtuar gjeologëve, minatorëve, metalurgëve dhe punonjësve të energjisë elektrike që kanë dhënë një kontribut të çmuar në historinë industriale të Kukësit, Hasit dhe Tropojës.
Ndërtimi i memorialit u realizua me mbështetjen e “Kastrati Group”. Zëvendëspresidenti i “Kastrati Group”, Leonard Kastrati u shpreh se kjo mbështetje vjen në nderim të një trashëgimie pune dhe sakrifice që, sipas tij, meriton të kujtohet përjetësisht.
Inxhinieri Pajtim Bello, ish-drejtues i industrisë minerare në Kukës, tha se monumenti do të mbetet një dëshmi e sakrificave të shumë brezave të minatorëve dhe specialistëve të kësaj industrie.
Edhe Qazim Laçi, ish-drejtor i Minierës së Bakrit në Gjegjan, e cilësoi memorialin si një vepër madhore për historinë e Kukësit dhe të gjithë Shqipërisë.
Memoriali “Sakrifica” u realizua nga skulptori Besart Papa, ndërsa projektimi urbanistik dhe arkitektonik i sheshit u krye nga arkitekti Andrit Shehu.
Në ceremoninë e përurimit morën pjesë përfaqësues të pushtetit vendor, biznesmenë dhe qytetarë të shumtë.
