Partia Demokratike ka prezantuar propozimin e saj për reformën administrativo-territoriale, duke kundërshtuar qasjen e ndjekur nga Partia Socialiste, të cilën e konsideron të njëanshme.
Ekspertët e PD-së kanë hartuar një draft që sugjeron themelimin e 100 bashkive dhe krijimin e 6 rajoneve. Ky dokument u është dërguar anëtarëve të grupit parlamentar demokrat nga bashkëkryetari i Komisionit për Reformën Territoriale, Luciano Boçi.
Boçi, në një mesazh për deputetët e PD-së, thekson:
“Të nderuar deputetë, me miratimin e Kryetarit të PD dhe të Kryetarit të grupit, ju përcjell listën e bashkive (100) të paraqitur në raport nga ekspertët tanë. Secili mund të bëjë më pas prononcimin e vet. Falenderime!”
Kjo nismë e opozitës vjen në vazhdën e mosmarrëveshjeve mes partive politike në Komisionin për Reformën Territoriale, ku Partia Demokratike ka akuzuar Partinë Socialiste se ka vepruar e vetme, pa dialog dhe duke injoruar sugjerimet e opozitës.
Përfaqësuesit demokratë thonë se modeli me 100 bashki dhe 6 rajone synon të sjellë një ndarje më të drejtë të pushtetit vendor dhe të garantojë përfaqësim më të plotë të komuniteteve vendore.
