Pas 59 vitesh, në fshatin Kabash të Pukës u rikthye falja e Kurban Bajramit, aty ku në vitin 1967 u shkatërruan xhamitë gjatë regjimit komunist. Ceremonia fetare u zhvillua në rrënojat e xhamisë së zonës dhe u drejtua nga Gëzim Kopani. Ky organizim shërbeu jo vetëm si një moment besimi dhe reflektimi, por edhe si një mundësi për të rikthyer në fshat banorët që janë larguar ndër vite. Në mesazhin e tij, myftiu i Pukës u lut për paqe, harmoni dhe begati për të gjithë besimtarët.
Pas faljes, festa vijoi me ritualet dhe traditat karakteristike të zonës. E veçanta e kësaj dite ishte pjesëmarrja e besimtarëve katolikë së bashku me vëllezërit e tyre myslimanë, duke dëshmuar edhe një herë bashkëjetesën dhe harmoninë fetare që e ka karakterizuar ndër shekuj këtë zonë të Pukës.
Banorët që u rikthyen në vendlindje për festën u shprehën të lumtur që panë sërish gjallëri në fshatin e tyre, i cili prej vitesh po përballet me braktisjen.
Festa e Kurban Bajramit përcolli këtë vit në Kabash një mesazh të fortë solidariteti, harmonie dhe bashkimi, duke i dhënë jetë dhe shpresë një fshati thuajse të braktisur.
