Agjencia e Kombeve të Bashkuara për klimën paralajmëroi të enjten se El Ninjo mund të shënojë nivelin më të lartë të fuqisë që nga fillimi i monitorimit katër dekada më parë, ndërsa drejtuesi i OKB-së deklaroi se bota është futur në “zonën e rrezikut të motit ekstrem”.
Organizata Botërore Meteorologjike (WMO) bëri të ditur se fenomeni klimatik pritet të forcohet edhe më shumë në muajt e ardhshëm dhe është e sigurt se do të zgjasë deri në shkurt.
Shefja e WMO-së, Celeste Saulo, u shpreh nga Gjeneva: “Nëse kjo trajektore vazhdon, mund të jetë më i fuqishëm se çdo El Ninjo tjetër që nga fillimi i monitorimit tonë”.
Sipas WMO-së, El Ninjo pritet të arrijë kulmin në fund të këtij viti, por efektet e tij në klimë do të shfaqen deri në vitin 2027.
Liqene dhe lumenj të prekur nga thatësira
Ky fenomen ngroh temperaturat e sipërfaqes së oqeanit në pjesët qendrore dhe lindore të Oqeanit Paqësor ekuatorial, duke ndikuar në mënyrë të konsiderueshme te erërat, presioni atmosferik dhe sasia e reshjeve kudo në botë.
Nxehtësia që grumbullohet në oqeane, kalon ngadalë në atmosferë, duke shkaktuar rritje të temperaturave globale deri një vit pas shfaqjes së El Ninjos.
El Ninjo i fortë i viteve 2023-2024 ndikoi ndjeshëm që 2024-a të regjistrohet si viti më i nxehtë ndonjëherë dhe, sipas Saulo, “nuk duhet të habitemi nëse ky rekord thyhet”.
WMO lajmëroi: “El Ninjo është vendosur fuqishëm dhe do të intensifikohet në një fenomen shumë të fuqishëm në muajt e ardhshëm, me ndikime të mëdha në modelet e reshjeve dhe temperaturave dhe rreziqe të lidhura me përmbytjet, thatësira dhe nxehtësinë ekstreme”.
“Në zonën e rrezikut”
El Ninjo lind natyrshëm dhe nuk është një pasojë e drejtpërdrejtë e ndryshimeve klimatike.
Megjithë këtë, shkencëtarët parashikojnë që prania e tij të shtojë nxehtësinë në një planet tashmë të prekur nga efektet e përdorimit të karburanteve fosile, duke e theksuar edhe më shumë ekstremet e motit.
Kreu i OKB-së, Antonio Guterres, u shpreh: “El Ninjo po bëhet gjigant para syve tanë”.
Ai vijoi: “Shkenca nuk lë vend për dyshime: planeti ndodhet në ujëra të paeksploruara dhe këto ujëra po ngrohen. Temperaturat e sipërfaqes së detit po rriten, temperaturat vazhdojnë të ngrihen dhe bota ndodhet në zonën e rrezikut të motit ekstrem”.
Saulo i bëri thirrje autoriteteve përgjegjëse për menaxhimin e emergjencave dhe atyre në sektorë të ndjeshëm ndaj klimës, përfshirë bujqësinë, peshkimin, shëndetësinë, industrinë energjetike dhe ujin, që të marrin masa përgatitore.
Ajo theksoi: “Ky El Ninjo i jashtëzakonshëm… ka potencialin t’u japë një goditje të fuqishme komuniteteve dhe ekonomive në mbarë botën”.
“Ne tashmë po shohim ndërprerje dhe shkatërrime të shkaktuara nga thatësirat dhe përmbytjet dhe presim që këto ndikime të rriten teksa El Ninjo intensifikohet”.
El Ninjo ndodh zakonisht çdo dy deri në shtatë vjet, me një kohëzgjatje nga nëntë deri në 12 muaj.
Kushtet klimatike alternohen midis El Ninjos dhe të kundërtës së tij, La Ninja, ndërsa në periudha të caktuara mbizotërojnë kushte neutrale.
